ابــــــــــــــــــنى

ابــــــــــــــــــنى

ف تمام الثانية ظهرا يسيقظ هانى على اصوات الشارع المعتادة ليبدا يومه -الروتينى لحد كبير- ينهض متثاقلا من على فراشه يقف ليقوم (بفرد) ظهره متثائبا يمشى مترنحا ليغسل وجهه بعدها اتجه لغرفة المعيشة قائلا: "صباح الخير يا ماما .قابلته الام بحضن دافئ وقبلة على جبهته قائلة: صباح الخير يا حبيب ماما اجبلك تفطر بقى؟ قبلها هانى هو الاخر قائلا: لا خليكى ي ماما انا هاعد شوية كده اشوف الفيس بوك بتاعى وهافطر كمان شوية خليكى انتى عشان رجليكى المكسورة..جلس هانى حتى رن هاتفه فاذا بخطيبته يارا تشكو له شجارها مع امها قال: ف ايه بس يا حبيبتى فهمينى؟

يارا: ماما ياسيدى مش راضية تنزلنى النهاردة بليل مع اصحابى

هانى: معلش يا حبيبتى عيب برضه تتخانقى مع مامتك وتزعليها روحى كده صالحيها وحاولى معاها وان شاء الله هتوافق :)..... انهى هانى كلامه مع يارا ثم جلس ليتناول الفطار " فول وكوباية شاى" كعادة اغلب المصريين ثم قال: ماما انا نازل لمحمد صاحبى كمان شوية هتعوزى حاجة؟.. ردت الام: لا خلى بالك من نفسك يا حبيبى هترجع تتغدى ولا هتاكل بره؟...رد محمد: لا ياست الكل انا هاكل مع اصحابى النهاردة ومش هاجى غير بليل متاخر بقى...الام: طب خلى بالك على نفسك يا حبيبى لاحسن انا قلبة مقبوض النهاردة...ضحك محمد ضحكة خفيفة: يا ماما انتى بس عشان انا ابنك الوحيد وبتخافى عليا كل كام يوم تقولى كده :) وقبلها محمد على وجنتيها مغادرا المنزل

************

المشــــــــــــــــهد التـــــــــــــــــانى

المكان: احد المطاعم

الزمان: 7 مساء

يجلس محمد وهانى ف انتظار الطعام...محمد: ايه ياعم خير عايزنى ف ايه؟

هانى: مفيش ده انا كنت هاحكيلك على حلم كده حلمته النهاردة

محمد: حلم ايه خير؟

هانى: حلمت يا سيدى ان انا وانت واقفين ادام بحر وماسكين ايد بعض فجأة طلعلنا منه حاجة غريبة اوى زى متقول كده وحش من الى كنا بنلعب معاهم ف لعبة باتمان :D

محمد بسخرية: هههههههههههههههههه وحش ايه يابو وحش ده انت باين الكلية لحست دماغك وطبعا هتقولى قتلنى انا وانت وقطعنا :D.. ها كمل

هانى : الغريبة بقى انه مقتلناش على طول ده حاول يفك ايديا من ايدك الاول ولما معرفش قتلنى انا بعديها جه اهلك واهلى شوية من اهلى اتهموك وشوية صدقوك وقامت يا معلم خناقة بين العيلتين ايه عينك متشوف الا النور :D

محمد:ههههههههههههههههههههه اه يا عبيط...اسكت اسكت الاكل جه اهو خلينا ناكل الاول

انتهى محمد وهانى من الطعام وقال هانى: متيجى نروح القهوة نقابل العيال اصحابنا عشان عندى معاد الساعة 12 انت عارف لازم اروح....محمد: اشطا يلا نروح وانا هاكلم ايهاب وعلى يجولنا هناك

***********************

المشـــــــــــهد التــــــــــــالت

المكان القهوة

الزمان: قبل منتصف الليل بشوية

رائحة شيشة واصوات دومينو بيتخبط وواكواب من الشاى والقهوة يقول على: ايييييه ياعم هانى سرحان ف ايه انت الى عليك الدور العب

هانى:اه معلش وادى شيش بيش

ايهاب: يابن اللعيبة قفلتها يعنى عدو يا خوالنا ورقكوا

محمد: هما كده المهندسين يحسبوها بالورقة والقلم ضاربا محمد على وجهه بخفة على سبيل الهزار فسقطت القهوة عليهم

هانى: شفت بقى وقعت القهوة ازاى يابنى اتعلموا اللعب الاول وبعدين تعالوا العبوا

ايهاب:هههههههههه معلش بيقولوا القهو ةلما تقع خير

...هانى: خير ان شاء الله..بقولكوا ايه لازم اقوم دلوقتى عشان اروح مشوارى اشفكوا بكرة بقى...اخذ هانى يودع اصحابه ويقبلهم فقال على: ايه ياعم هانى مالك ولا كانك اخر مرة هتشوفنا انت ناوى تهاجر ولا ايه

هانى: ياعم بسلم عليكوا الله ده انت رخم اوى :D

محمد: بقولك يا هانى والنبى فوت خد اختى من عندكم ف البيت كانت مع مامتك وديها البيت عندنا

**************************

المشـــــــــــــــــهد الاخير

المكان: الشارع

هانى يمشى مع فاطمة اخت محمد...فاطمة تقول: وسى محمد بقى مجاش خدنى ليه وباعتك انت مش انت وراك مواعيد؟

هانى: مانت عارفة اخوكى الكسلان.....فاطمة: بس اما اشوفه..معلش يا هانى تعبينك معانا

هانى: بس يا عبيطة ده انتوا اكتر من اخواتى مش اصحابى وبس...يرن هاتف هانى ويقول: لحظة واحدة ارد على ماما

هانى : ايوا يا ماما...لا انا بس بوصل فاطمة وهادخل دلوقتى وان شاء الله تيجى معايا المرة الجاية لما رجلك تبقى كويسة..مع اال.... وانقطع الصوت

حاولت ام هانى ان تتصل به ولكن لا طريقة للوصول له فقالت: الشبكة وحشة ده حاجة بايخة

ف هذه الاثناء تشاهد ام هانى التلفاز وفجأة: حادث انفجار سيارة مفخخة أمام كنيسة المقدسين بالإسكندرية ذهب اثره العديد من القتلى

صرخت ام هانى ثم اغمى عليها قائلة: بسم الصليب...ابــــــــــــــــــنى

عجز الاعجاز

عجز الاعجاز

لا اعلم هل ليدكم علم بما ساقوله ام لا ولكن بعد ابحاث طويلة منى استغرقت "شهر تقريبا"قررت انى احكيلكوا الحكاية كما حدثت باختصار " خلينا نبتدى"

رويترز- 20-10-210 ..كذُب شارل بولدين احد قادة وكالة ناسة الشهيرة لعلوم الفضاء طارق المرغنى " احد العرب فى وكالة ناسا" ما تناقله بشأن وجود لفظ الجلالة الله فى الفضاء وقال " ما قاله كان كذب وقد حذرناه من هذه الاكاذيب التى كان دوما يطلقها"

عند سؤال طارق عن هذا الامر قال " شوهد لفظ الجلالة ف الفضاء وتم عمل ابحاث سرية عن هذه الظاهرة واكتشفنا الاتى:

"عند دوران الارض حول الشمس ف الارض لا تسير فى مسار دائى منتظم ولكنها تهتز قليلا للاعلى وللاسفل ويمنا ويسارابسبب عدم تساوى الضغط عليها بعد اتساع ثقب الاوزون وبسبب ظاهرة القصور الذاتى فاصبحت ترسم اسم الله كل 1.65 دقيقة بقياسات الارض اى 99 ثانية والتى اظنها انا " اسماء الله الحسنى"..

"ليس هذا فحسب بل ان الاقمار التى تدور حول الكواكب ترسم اسم الله ف مثلا القمر الوحيد الذى يدور حول الارض يكملها مرتين كل شهر اما المشترى فيحتوى على 63 قمرا كل قمر منهم يرسم اسم الله ف الفضاء"

واضاف" بعد اكتشاف كل هذا هددونى بقول هذه النتائج - فمن المعروف ان رئيس وكالة ناسا من الملحدين - وهددونى بالفصل وها انا الان بلا عمل"


{ يريدون ليطفئوا نور الله بأفواههم والله متم نوره ولو كره الكافرون (8) } سورة الصف
قد يتسائل البعض الان اذن ما هو عجز الاعجاز؟ الاعجاز هو الانسان..وعجز الاعجاز اى عجز الانسان القارئ لهذا العمود ف اكتشاف ان كل ما اقوله هو " من نسج خيالى " فقد انتهى عصر المعجزات والانسان اى انت هو المعجزة الوحيدة القادرة على احداث التغيير..متصدقوش كل حاجة ابوس ايديكوا !!!!

الأشياء التي تشاهدها اصغر ممّا تبدو في الواقع

الاشياء الى تراها ف المراّة اصغر مما تبدو عليه ف الواقع
كنت ف احد سيارات التاكسى ابدا يومى الطويل مع سائق مرسوم على وجهه (الوقار) بلحيته حين بدات عينى تقع

على جملة على المراة الجانبية "الأشياء التي تشاهدها اصغر ممّا تبدو في الواقع"..



تطرق الى ذهنى اوهاما عن انخفاض الاسعار من احد المسئولين وفجأة تلاقى الطماطم بقت ب 8 جنيه ف "حمرا"... يا

قوطة طبعا..مسئول اصغر مما يبدو عليه ف الواقع

تطرق الى ذهنى صورة من عذبوا وقتلوا خالد سعيد او من ضرب طالبة الزقازيق فهم من الطبيعى رمز للامان اما ف الواقع

فهم اصغر مما يبدون..



عندما تسمع الشخص الخفى ف اعلانات الضرائب وتجد انه من مصلحتك دفع الضريبة من اجل "راحة سعادتك" ثم

تكتشف العديد من البلاعات المفتوحة او "تقطع" عليك الكهربا كل " خمس" دقايق.."فعذرا ايها اللهو الخفى انت

اصغر مما تبدو"


ان كنت مهتما بالكتابة وسمعت لقب " السيد" فلان فقد تظن انه مثل ويليام شكسبير مثلا ولكنك تجد ان هناك من ياخذ

لقب "السيد" لمجرد انه ابن احد الشخصيات المهمة "فهو اصغر مما يبدوا عليه ف الواقع"

تطرق الى ذهنى عروبتنا الى تفتت من اجل ماتش كورة " لا راح ولا جه " -مع انى متعصب عشان مصر - فهى

عروبة اصغر مما تبدو عليه ف الواقع

يتطرق الى ذهنك نائب مجلس الشعب " الموقر" فى دائرتك..فتذهب لتقرأ الجرائد وتجده نائما او "بيأزأز" لب..فهو

اصغر مما يبدو عليه ف الواقع

حينما تدخل احد المستشفيات الحكومية ف حالة طارئة ولكن تكتشف "انهم بيعاملوك اسوأ معاملة" ف المسئول هو اصغر مما نراه ف الواقع

اخذ عقلى قليلا دكتور ف الجامعة يعاملك كحشرة , يدخل المحاضرة من اجل التباهى " والتنطيط على سعادتك"

وكل ما يشغله انت لابس تى شيرت ولا قميص مطول شعرك ولا مقصره ( كفاية عشان مسقطش).."عذرا فانت

اصغر مما تبدو عليه"

قد يتلون امام عينيك مربى اجيال يستغل درجات اعمال السنة " عشان الطلبة ياخدوا عنده دروس " فهو اصغر مما

يبدوا عليه ف الواقع"

يتطرق الى ذهنك اخوك او ابن خالتك الى ضحكوا عليه وقالوا " اوعى تاخد دروس خصوصية" بالرغم ان الكتب

لسه منزلتش..فمن اقنعوه بذلك هم اصغر مما يبدون عليه ف الواقع

تطرق الى ذهنى اخيرا شخص مسئول عن كل هذه الفوضى بل ويحكم اكثر من ربع قرن مما يجعلك تظن انه اعظم من نيلسون مانديلا مثلا ولكنه للاسف"اصغر مما نراه ف الواقع"

فجاة فرمل سواق التاكسى مما ادى لاصطدامى بالزجاج الامامى..فقلت له: ايه ياعم حاسب؟..رد عليا: ايه ياعم انت

مش نازل طب؟ انجر انزل...فاعطته اثنان من الجنيهات كما هو المعتاد عندنا فلم يحمد الله وقالى" انا عايز خمسة

جنيه هو اييه احنا شغالين عندكوا.. نظرت لدقنه التى خدعتنى و رديت عليه " انت اصغر مما تبدو عليه ف

الواقع"...فجاة صحيت م النوم..مخضوض..مفزوع..خير اللهم اجعله خير ده بلد ايه دى الى فيها البلاوى دى؟..ثم

اخدت نفس عميق وقلت" الحمد لله..ده انا ف مصر..مفيش حاجة من دى والحلم ده " اصغر مما يبدو عليه ف

الواقع"

يــــا رب يـــــرجعوا تانى

يــــا رب يـــــرجعوا تانى

احمد شاب مصرى فى ال 16 من عمره سافر والده للمملكة العربية السعودية من اجل العمل..واخيرا جاء يوم عودة الاب الذى ينتظره احمد واخته وامه من مدة ليست بالهينة.....

الزمــــــــــــــــــــــان: الظهر قبل وصول الاب

جلس احمد ممسكا ب (طاربوش) جده ف قد كان دوما فخورا بهذا الطربوش الذى كان رمزا معبرا عن المصريين وكم من المرات جلس احمد مع ابيه و ابيه يحدثه عن جده زمان وعن اصاله المصريين ف هذا الوقت ف مهما كانت الظروف فقد كنت تجد الابتسامة على وجه المصرى على عكس ما يحدث ( اليومين دول)...فجأة رن جرس الباب اندفع احمد ممسكا بمقبض الباب ليفتحه وقال: ماماااا بابا وصصصصصصصصصل...ارتمى احمد ف حضن ابيه ثم لبس الطربوش وقال له بطريقة الميرى : نورت البيت يا سعادة الباشا بابا ....

كانت المفاجأة من الاب بان قام بضرب الطربوش من على راس ابنه وقاله بتكشيرة: اخلع هذه البدعة بعيدا عنى...نظر احمد بدهشة الى ابيه وسط دهشة من الام والاخت ايضا وقال: بدعة؟

الاب: نعم بدعة وكل بدعة ضلالة وكل ضلالة ف النار ...

الابن بدهشة: ف النار؟ مش ده الطربوش الى انت كنت بتحبه؟ وتعد معايا تحكيلى على ايامه؟ وبعدين حضرتك ليه لابس غطرة سعودى؟

دخل الاب بنرفزة كبيرة وقال: انت من ستعملنى ( ازاى) البس؟ وصفعه صفعة شديدة ثم دخل الى غرفته وخلفه زوجته وسط دهشة شديدة منهم جميعا

الزوجة: فى ايه يا ابو احمد ده ابنك كان هيموت ويشوفك تقوم انت تضربه؟

نظر الاب الى زوجته ( من فوق ل تحت) : وماهذا؟ ايه الى انتى لابساه ده؟

الزوجة: ايه؟ الجيبة ولبس الخروج بتاعى كنت بجيب شوية حاجات للبيت قبل مانت تيجى

الاب: هذه الملابس فاااااجرة ..اسمعى..منذ الان..او زى مبتقولوا ف مصر من هنا ورايح مفيش اللبس الفاسق ده..يجب ان ترتدى النقاب انه زى العفاف....

الزوجة:زى العفاف؟ وماله اللبس بتاعى؟ لا انا لابسة جيبة محزأة ولا لبس شفاف

الاب: يجب عليك طااااعتى واياكى انى اشوف هذه الملابس مرة اخرى وقد اعذر من انذر

__________________________________________________________

المشــــــــــــهد التــــــــــانى

المــــــــــــــكان: الصـــــــــــالة

كان الاب يشاهد التلفاز على احد القنوات التى يسمونها( دينية) يستمع لاحد الشيوخ..ثم قال: يا احمد..تعالى اتفرج معايا...فرح احمد فقد كان يامل عودة ابيه الذى كان يعرفه مرة اخرى...

احمد : ايوا يا بابا

الاب: تعالى اتفرج شوف كلام الشيخ الجليل على ال مسعود الكلبانى( ده مجرد اسم )

احمد بعد ان مسك الضحك: ال ايه يا بابا؟

الاب: الكلبااااااانى..استمع استمع

اخذ الشيخ يتحث عن قصة سيدنا موسى وكلما قال كلمة يردد الاب: الله اكبر... الله اكبر

احمد: الله اكبر على ايه يا بابا؟ هو الراجل قال حاجة جديدة؟ ده انا عارف القصة دى وانا ف الحضانة

الاب: اصمت يا فتى...ده الشيخ الكلبانى راجل فاضل وقراته للقران رائعة...

ظل احمد يستمع الى الشيخ مع ابيه لمجرد الا يعاقبه ابيه وفى هذه الاثناء خرجت امه من الغرفة وقالت: هلم بنا ياابو احمد لنخرج..نظر احمد الى امه فوجد الكارثة الكبرى...وجد امه ترتدى النقاب...نظر احمد بذهول الى امه تارة والى ابيه تارة وقال: ايه يا ماما الى انتى لابساه ده؟ ده انتى زى العفاريت

صرخ الاب ف وجه ابنه: اخرص يا قليل الادب...هل تتهكم على الدين؟ هل تتهكم ع الزى الاسلامى الشرعى؟

خاف احمد من تصرفات ابيه وقاله مرغما" انا اسف يا بابا"...خرج الاب والام وجلس احمد مع اخته

احمد: ايه ده يا ريهام؟ بابا بقى عامل كده ليه؟ فاتحلى على شيخ اسمه الكلبانى داهنلى شوية مكياج عشان يقولوا وشه منور وبيحكى قصة عارفينها من زمان وبابا يقولى ده العلم؟فين زمان لما كنا نعد نقرا كتب؟ فين لما كان بيحكيلى على عرابى وسعد زغلول؟ فين لما كنا نسمع الشعراوى وتلاوة محمد رفعت والمنشاوى؟ شفتى يا ريهام ده رمى الطربوش وبيقولى بدعة؟ وشفتى ماما؟ لابسة نقاب وبيتصرفوا تصرفات وهابية غريبة؟بعد ما كان بيعد يثقفنى يقولى اسمع الشيخ الكلبانى ف قصة قديمة؟

فين لما كان يصر يسمعنى ام كلثوم و عبد الحليم؟ فين لما كان بيقولى الفن بيهذب النفوس؟ دلوقتى بيقول الفن كفر...فين لما كان يدينى كتاب لنجيب محفوظ عشان اقراه دلوقتى بيدينى كتب لناس مش معروفة وكلهم من الخليج؟ نسى مصر فجأة؟

ريهام: انا مش عارفة يا احمد بقى بيعمل كده ليه..شفت امبارح حصل ايه؟

احمد : ايه؟

ريهام: منعنى اكلم صاحبتى المسيحية وقالى انى كلامى معاها حرام..نسى فجأة حكاياته عن ثورة سعد زغلول وعن المواطنة؟ نسى زمان لما كنا بننقل ف الشقة دى وكان عمو جورج بيساعده ف كل حاجة؟ فاكر يا احمد لما عزمونا ف رمضان وكان الفطار عندهم؟ نسى لما كان بيقولى" لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم إن الله يحب المقسطين"...دلوقتى بقى بيجيب احاديث غريبة عن ضرورة عدم معاملة المسيحيين معاملة كويسة!!

وشفت دقنه؟ بيقولك سنة مؤكدة وممكن تبقى فرض...طب فين اخلاق بابا المتسامحة بتاعت زمان ومعاملته مع الناس الكويسة؟ ده دلوقتى لما بيشوف حد من اصحابه يحاول يناقشه ف الحكاية دى يقول عليه علمانى مش عارف دينه..طب هى الاخلاق الكويسة دى مش من الدين؟وليه عايز يجبرنا على ارائه؟مش ربنا قال افلا تعقلون؟ مش لازم يقنعنا؟مش ده الى ربانا عليه؟

فين لما كان بيحكلنا عن معاملة المصريين ومساعدتهم وحبهم لبعض زمان؟دلوقتى بقى بيعارض اى حد لمجرد انه مش لابس زيه؟ او مربى دقنه زيه؟

احمد: للاسف بابا يا ريهام معندوش كلام يقنعنا بيه ف بيلجأ للطريقةدى..بابا خرج الدين من قلبه وعمله على شكل مظاهر..على شكل نقاب..وعلى شكل دقن...وفقد مصريته.... يارب بابا وماما يرجعوا تانى زى زمان...يرجعوا مصريين...يارب



مصــــر هى الصبح بدرى.مصـــر صوت الفجر يدن سوبيا . فول . طعمية .كشرى. دوم . بطاطا سخنة جداااا"

مصــــر اول يوم العيد .عيدية .بمب ولبس جديد ميكروباص واتوبيس ومتروو . حفلة تلاتة فى سينما مترو

موائد رحمن . فانوس رمضان . مسلم فى بيت مسيحى فطرووا ترنيمة لايقة على تخت غنى . تأييلة العصرية ولمة على الطبلية فى مصر مولد السيدة والذكر والهيصة وركعتين بركة فى السيدة نفييسة

والمشى ع الكورنيش . دى تتعبك ولا بتسيبها تحيرك برضه حاببها على بعضها كدا بعيوبها حتة منك فيها حاجة حلوة . حاجة حلوة بينا " كلمات : ايمن بهجت قم

شورى ولا ديمقراطية...مسيحيين ولا مسلمين؟

شورى ولا ديمقراطية...مسيحيين ولا مسلمين؟

المكان:اوضتى

الزمان:اى وقت

اعد لا بيا ولا عليا ..صادفنى فيديو للشيخ وجدى غنيم بيتكلم عن الشورى والديمقراطية...قلت وماله نسمع بيقول ايه

لقيته بيقول الاتى:

عندنا شورى ف الدين مفيش ديمقراطية

وامرهم شورى بينهم وشاورهم ف الامر واسم السورة سورة الشورة

ليه اقول ديمقراطية واخد حاجة من بره؟ وانا عندى الشورى ف الدين؟الدمقراطية قايمة على كفر

الحاجة الى ورد فيها نص مفيهاش شورى ام الديمقراطية بالاغلبية ف كل حاجة

زى مثلا احنا عايزين نخلى الصلوات الخمسة تلاتة الى موافق يرفع ايده؟

شفت الفيديو من هنا واجننت:الله يخربيتك على يخربيت الجهل الى ملا البلد يا جدعان ومسمينكوا شيوخ وقمت منزل الفيديو

ع الفيس عندى وقابلنى شوية كومنتات معارضة لكلامى لقيت فيها كومنت هو الى خلانى اكتب النوت دى ...اسيبكوا مع

الكومنت

ya faris ana mesh ha2olk enk gahel zy ma enta 2ollt 3la el shee5 .. ana bs ha2olk 3eeb feek ymken

ENTA mesh wa5eed balak mno w tsala7oo , kalamk ely enta katbo dah byadool 3ala eleet el emaan fe

qalbk , w dah mesh mostab3aad mn wa7eed k...ol es7abo mese7yeeen !!....bs ely ana ha2olo bgd hwa

en rabena yhdeek !!......God Bless u yabny walahy

ملحوظة:الشيخ وجدى اخوان مسلمين

ده لينك الفيديو اتفرجوا عليه الاول

http://www.facebook.com/video/video.php?v=10150176987600414&ref=mf

__________________________________________________

طبعا فرق سن رهيب بينى وبين فضيلة (الى بيسموه شيخ) بس يلا هاطلع (مجادل) و(ايمانى ضعيف) زى ما بعض الناس

قالت وهارد عليه

اولا الديمقراطية:

الكل يعرف الديمقراطية بكلمتين سهلين جدا...حكم الشعب لنفسه عن طريق نواب بيختارهم الشعب...طب ما نيجى نتوسع

شوية ف الديمقراطية؟

الديمقراطية نوعين: الاولى هى ديمقراطية غير ليبرالية او بيسموها ديمقراطية مزيفة...لان الحكومة بتوصل فيها للحكم دون

الرجوع للشعب...الشعب ملوش هيكل دستورى بيحافظ على حقوقه المدنية...معندكش حرية تعبير... وعدم احترام الاقليات ولا

حقوقهم(يعنى لو الدولة اغلبها مسلمين يبقى طظ ف الديانات الاخرى-لو الحكومة وطنى طظ ف الاحزاب الاخرى وهكذا...الخ

يعنى اقرب الى الديكتاتورية

اما الديمقراطية الى احنا نعرفها بفهومها الكويس هى ديمقراطية ليبرالية: اى حكم الشعب لنفسه واختياره للحاكم وتقلده

للسلطات التشريعية عن طريق نواب بيختاروا الشعب بنفسه..... يكون ليه راى حر..حرية تعبير...قوانين تحافظ على الاقليات

وتحافظ على حقوق كل انسان...

تعالوا نمسك نقطة صغيرة:ازاى الشعب هيختار النائب بتاعه؟ يعنى و لنفترض حزب ( س) عدد افراده (ص) ازاى هيتم

الاختيار؟...بالتصويت...التصويت يدل على ايه؟ على راى الاغلبية؟ هل هناك تعارض ف هذا لامر مع الشورى؟جاوبوا

انتوا

لما يكون فى قرار جديد...والريس مثلا هيناقشوا ف مجلس الشعب والى موافق يرفع ايده او يعمل التصويت الفلانى

بالكمبيوتر او اى وسيلة مين الى هيختار؟ النواب الى اختارهم الشعب...طيب النواب دول هيتصرفوا بمزاجهم؟ لا طبعا لانهم

اخدين الموافقة من الحزب المعين الى اختارهم اعدوا كده واتجمعوا ووافقوا على الراى الفلانى...زى ف الحزب الى انا

منتمى ليه لما بيكون فى حاجة هتتناقش بيبقى فى اجتماع ف الحزب ويا موافقين يا مش موافقين

باختصار..المقارنة بين الديمقراطية والشورى او وضع ده ف كفة وده ف كفة هو من (الغباء) لانه بمثابة المقارنة بين الهدف

والوسيلة!

هل ينفع ليا انى اقارن بين الطيارة وشرم الشيخ؟ بلاش....هل ينفع اقارن بين الطيارة وجناح الطيارة؟ او اقول انى بحب

الطيارة بس مبحبش الجناح ده؟

الديمقراطية هى وسيلة للوصول للشورى...الشورى هى احد دعائم الديمقراطية....الشورى جزء لا يتجزأ من

الديمقراطية...ولكن بعض الناس( الى عاملة فيها شيوخ) عايزين يرجعونا لسنين كتير فاتوا...يقولك احنا عندنا

شورى..معندناش ديمقراطية...احنا نطبق الشورى لكن منطبقش ديمقراطية...هل ده كلام المفروض انه يتصدق؟

الشيخ بيقول (من وجهة نظرى بكل استخفاف بعقول المشاهدين والمستمعين): "الحاجة الى ورد فيها نص مفيهاش شورى ام الديمقراطية بالاغلبية ف كل حاجةزى مثلا احنا عايزين نخلى

الصلوات الخمسة تلاتة الى موافق يرفع ايده؟"

هنا هنوصل للجهل بعينه...لان الديمقراطية تضمن حق الحرية الدينية وحرية ممارسة العقائد المختلفة دون تمييز فهل هييجى

يوم ونعمل استفتاء نخلى فيه الضهر ركعة واحدة مثلا؟...للاسف كلامه غير مبنى على اى حاجة صحيحة

________________________________

قريت مقال كبير لوجدى غنيم بيقول بالنص "تقوم الديمقراطية على مبدأ المساواة - في الحقوق والواجبات - بين جميع شرائح

وأفراد المجتمع بغضِّ النظر عن انتماءاتهم العَقَدية والدينية والسيرة الذاتية لأخلاق الناس فيستوي في نظر الديمقراطية أكْفَر

وأفجر وأجهل الناس مع أتقى وأصلح الناس وهذا النوع من المساواة لا شك في بطلانه وفساده؛ لمساواته بين الحق والباطل،

وبين المتضادَّيْن المتناقضَيْن، ومغايرته ومخالفته لكثير من النصوص الشرعية المُحْكَمة، كما في قوله تعالى: أفمن كان مؤمناً

كمن كان فاسقاً، لا يستوون، وقال تعالى: أفنجعل المسلمين كالمجرمين، ما لكم كيف تحكمون، وقال تعالى: أم نجعل الذين

آمنوا وعملوا الصالحات كالمفسدين في الأرض أم نجعل المتقين كالفجار.

وهنا بقى كعادة هؤلاء الناس الى مسميين نفسهم ( شيوخ) ف استغلال نصوص القران للى هما عايزينه واستغلال لعقول

الناس الفاضية...انا شخصيا لو واحد معرفش ومش بدور ورا كلام الناس دى وبسمع زى البطيخة هقول ده كلام صح؟ لكن تعالى افرجكوا حاجة بعد ما سمعت شوية كلام من الشعراوى عشان برضه مبقاش بقتى والسلام ولو ان الاية واضحة لاى بنى ادم بيفهم عربى

اول اية الى قالها "أفمن كان مؤمناً كمن كان فاسقاً لا يستوون".... طب تعالوا نشوف الاية دى والاية الى بعدها من سورة

السجدة "أَفَمَنْ كَانَ مُؤْمِنًا كَمَنْ كَانَ فَاسِقًا ۚ لَا يَسْتَوُونَ (18)أَمَّا الَّذِينَ آمَنُوا وَعَمِلُوا الصَّالِحَاتِ فَلَهُمْ جَنَّاتُ الْمَأْوَىٰ نُزُلًا بِمَا كَانُوا

يَعْمَلُونَ (19)....اى ان الفاسقون والمؤمنون غير متساويين عند الله.. والدليل ف الاية التانية...

شوفوا الايات دى

وقال تعالى "أم نجعل الذين آمنوا وعملوا الصالحات كالمفسدين في الأرض أم نجعل المتقين كالفجار"

وقال تعالى "لا يستوي أصحاب النار وأصحاب الجنة"

"أفمن كان مؤمنا كمن كان فاسقا لا يستوون" أي عند الله يوم القيامة".

كلها ايات لعدم المساواة (الالهية) زى مبنقول الجزاء من جنس العمل ده حتى ربنا محبته للمؤمن القوى اكتر من المؤمن

الضعيف ... اذن استغلال الايات دى كلها ف اتهام الديمقراطية انها تساوى بين الناس والعنصرية الى باينه ف كلامه فهو غلط

فى غلط لان الدين بتاعنا علمنا المساواة والعدل بين كل الناس اما وجدى باشا معترض على مساواة الناس ف الحقوق

والواجبات ومشاركتهم ف الحياة السياسية...

اختم الفقرة دى بجملة دكتور علاء الاسوانى"الديمقراطية هى الحل

______________________________________________

اخر حاجة وهى انى ارجع لكومنت معتز الى بيقولى فيه انى ضعيف الايمان وده شيئ مش غريب عليا لان كل اصحابى

مسيحيين ف الجامعة... فاحب اقولك حاجة لذيذة

"لا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ

تَبَرُّوهُمْ وَتُقْسِطُوا إِلَيْهِمْ إِنَّ الله يحب المقسطين"

الشعراوى بيقول ( الى شيخ بجد) مش بيفتى لصالح جماعات قذرة

البر: فعل خير يسر من فعل له

قسط ان كان مصدرها قسطا: عدل من البداية

اما ان كان قسوط:فمعناه ان كان هناك ظلم وجاء العدل

مقسطين: الذين ازالوا الجور

يعنى لو فيه حد يا معتز مش عارف حاجة ف دينه هيبقى انت مش انا لان كون انى اصاحب المسيحيين ده مش حرام ولا عيب

ولا يقلل من ايمانى ... اما كون انك تقول عليا ان ايمانى ضعيف عشان انا مصاحبهم او عشان انا بعمل حاجة ديننا قال عليها

يبقى متهيالى الغلط من عندك انت ولا ايه؟

حتى الرسول بيقول"لن تسعوا الناس باموالكم فسعوهم باخلاقكم" هل يعقل ان يدخل ف دينك واحد وانت مش بتديله وش؟ وانت اصلا رافضه ورافض المعاملة معاه؟وجايز ده غلطى الوحيد انى شتمت الراجل بس مش عشان شتمت عالم ولا شيخ لانه بالنسبالى مش عالم ومش شيخ بس عشان شتمت واحد لمجرد انه مختلف معايا والمفروض الى يختلف معايا احاول اقنعه مش اشتمه ودى فعلا غلطتى بس ادينى رديت فى النوت كلها عليه

الغلطة التانية لاخينا معتز بتدور ف نفس الحوار انه حكم عليا برايه الفظيع ان ايمانى ضعيف لمجرد انى مصاحب ديانة تانية...او جايز لمجرد انى مش بمثل ادام البنات واقولهم معلش اصلى رايح اصلى...او جايز عشان انا مش مربى دقنى زى الناس التانية ف الجامعة وعامل شيخ... او جايز عشان مش كل مدة اعمل نفسى فاكر ربنا ادام الناس واعمل ستيتاس دينية!!!! الدين جوا يا زيزو مش برا....اى انك م الاخر يا زيزو حكمت عليا بالمظهر برضه رغم انك متكلمتش معايا قبل كده 5 دقايق على بعض

اقرا النوت دى كمان جايز تكون مفيدة ليك ف حكاية الحكم بالظاهر

http://www.facebook.com/note.php?note_id=413679407788

________________________________

ختام النوت بكلام بسيط جدا مفيهوش فلسفة عشان العقول البسيطة لو موجودة تفهم

احب اقولك زى منير ما قال : يهمنى الانسان ولو ملوش عنوان"

مكى"م الاخر مهما هكون مش هعجب

برضه شوية..وهيطلع كام مليون يقولى عنى ده تييت مقلية..يشهد جحا ويا حماره واللي بيحصل حاجة عادية..ومثلى الاعلى

بقه هيكون شاب ديليفرى عزيمته قوية...لابس خوذة وراكب فيزبة ولا بيخاف تخبطه عربية...ولا بيهمه (كلاب الشارع) بس

يوصلكوا طلبية..وانا هعمل كده بمحبة وهكمل والناس حواليا...حاجة أخيرة انا عايز اقولها للى شتموا اظن لذيذة...كل واحد

فينا ليه استياله واي واحد فينا له ميزة..فى اللي بيعجب واللي ما يعجب واللى ما عجبو ياخد فيزا

سلام يا مقطقطين

طير انت

اسيبكوا مع الخبر الاول

رغم أن الفكرة تبدو مفرطة في التفاؤل للوهلة الأولى إلا أنها على وشك التحقق بالفعل، حيث صرح وائل المعداوى رئيس شركة سمارت للطيران بأنه تم التعاقد على 5 طائرات تربو مروحية للعمل كـ(تاكسى طائر) للتغلب على زحام الشوارع فى مصر.

وقال المعداوى فى لقاءه مع برنامج صباح الخير يا مصر بالتليفزيون المصرى الاثنين أن شركة سمارت هى أول شركة طيران للتاكسى الطائر فى مصر وقد وضعت استراتيجية لتوفير (تاكسى طائر) للتنقل بين المحافظات بنفس تكلفة الأتوبيس العادى.

المشهد الاول
المكان:صالة الكبير
الزمان:بعد العصر

انتهى ابن الكبير (جلال) من صلاة العصر (اصله مواظب ع الصلاة) على سجادة على شكل علم مصر... وفجاة دق الباب

جلال:افتحى يا بهيجة الباب..

بهيجة: يووووه هو مفيش ف البيت ده الا انا...وذهبت بهيجة لفتح الباب وقالت: ايوا مين؟

نظر جلال وقال: المعداااااااوى حبيبى اتفضل يا حبيبى البيت بيتك..

دخل المعداوى وبالاحضان والبوس : جلال حبيبى عامل ايه وازيك الكبير عامل ايه؟

جلاال: زى الفل يا صاحبى

المعداوى: طب انا كنت عايز اشوفه عايزه ف موضوع كده( اصل جلال ساكن مع الكبير ف البيت نظرا لازمة السكن)

جلال: لالا مش هينفع اصله تعبان شوية

المعداوى: ايه؟ يعنى كلام الجرايد صح؟ الكبير هيموت؟

جلال ف عقل باله ( يارب) ثم قال: يااخى تف من بقك الله..فال الله ولا فالك يااخى لا هو بس مخبوط ف صابع رجله الصغير ف مريح شوية

المعداوى: اه اه صابع رجله..بتبقى صعبة الخبطة دى ...المهم انا جايلك ف موضوع هنقلب فيه قرشين حلوين انما اييييه...فلةةةةةةة

جلال بطريقة حمزاوى(ميلودى):ايوا ادييييييييينىىىىىىىىىى الشغل ها ايه ايه؟ ها؟

المعداوى: شوف يا سيدى هنعمل التاكسى الطائر و... قاطعه جلال: تاكسى طاير ايه يابن المجانين بقولك ايه انت جاى تضيعلى وقتى؟

المعداوى: اسمع بسسس...هنعمل 5 طيارات تربو ( هيلوكبتر) وطبعا هى ولا تربو ولا حاجة ده اسم بس وهنقول ان فيها تكنولوجيا والااذى منه بقى....وهنقول انه بنفس سعر الاتوبيس العادى

جلال: اتوبيس؟ يعنى طيران وتكاليف وعايزين نسرق وانت تقولى اتوبيس؟

المعداوى: شوف شوف مستعجل ازاى....ده الى مواطن هيفتكروا انه رخيص لكن احنا هنغلى سعر الاتوبيس ل 50 جنيه وبكده يبقى نفس سعر الطيااارة... ( وشاور بصابعه السبابة نحية دمغه كده كعلامة للذكاء)

جلال بانبهار: يابن الايه يا لذينة!!!! طب وهطيلع لينا اد ايه من الليلة دى؟

المعداوى: يعنى من 100 مليون لطالع

جلال بنرفزة: ايه؟ ميت م...؟ امشى امشى اطلع بره... انت مجنون ياعم انت..انا عايز امن مستقبل عيالى( قال يعنى الحيلة جاب عيال)

المعداوى: خلاص خلاص انا هتصرف...اخد المعداوى الواجب بتاعه كوباية شاى ف الخمسينة وخلع

المشهد التانى
المكان: ف الشارع
الزمان: الضهر

تظهر اول طيارة من دول لونها اسود...متعلق عليها من النحية اليمين من الخلف ايد عليها 5 صوابع ( عشان الحسد) ومكتوب" متزمروش يا بهايم السواق نايم"

..ولو بصيت ع النحية التانية هتلاقى ايد برضه عليها خمس صوابع برضه ومكتوب" ياتهدى يا تعدى !!!" تمشى شوية لادام تلاقى الازاز الامامى مكتوب عليه " صلى ع النبى"..وجمبيها بشوية " كوتوموتو نايم على كمبوتو" ومحطوط ع التابلوه شوية كلاب وقطط من الى بيهزوا راسهم دول وتسمع اغنية" الدنيا زى المرجييييحة يوم تحت وفوووووووق"

ينزل السواق برجل ع الارض ورجل جول الطيارة مرتديا جلابية وعليها جاكت ولابس طاقية بحارة(مفكر انها بتاعت الطيار) وقال:" واحد تحري واحد تحري ( تحرير يعنى)

احد الركاب: ياعم خلصنا ياعم ماحنا كاملين اهو هو لازم واحد رابع ورا؟

السواق: وانت مالك ياعم؟ لعلمك بقى عليا الطلاق من مراتى ياجدع المكنة ما هتمشى من غير واحد رابع مش عاجبك شيله انت

الراكب: استغفر الله العظيم ياعم مش كفاية الحر؟مكتوب ورا ع الازاز 90 راكب هو يعنى الواحد ده الى هيفرق؟ ايه رايك انى هاشتكيك ف مرور الطيارات انا عندى واسطة بقى

السواق: انت بتهددنى ياعم اقولك حاجة مش عاجبك خدلك باراشوت وانزل وان مسكتش انا هحدفك م الطيارة حاجة تحرق الدم ع الصبح...ركاب هتيا بتعور ف اى هتش

احد الركاب: خلاص يا جماعة صلوا ع النبى..الا قولى يااسطى..هو ينفع تنزلنى فوق السطح بتاعنا؟ بدل ما اطلع السلم وانا راجل صحتى على ادى

السواق: ليه ان شاء الله الملاكى بتاع ابوك انا؟ تنزل زيك زى الناس ف المحطة

سكت الراكب وسكت السواق وركب واحد رابع ..

وقبل الانطلاق قال السواق: الاجرة يا جماعة زى الاتوبيس 50 جنيه..وقبل الانطلاق برضه انتحر كل من ف الطيارة وده طبعا ( لعدم وجود بارشوتات صالحة)...هيجيبوا خمسين جنيه منين !!!!!!!




المشهد التالت

المكان: المحكمة
الزمان: اى وقت

حكمت المحكمة حضوريا بالبراء على المعداوى صاحب مشروع الطيارات بعد تصادم 5 طيارات ومقتل اكثر من 500 شخص وتم القبض على سواقين الطيارات نظرا لانهم ( بيركبوا واحد رابع)
2-مكنش معاه شنطة اسعافات اولية ولا رابط الحزام بعد ما ان تم لقطه بالظابط فوزى المهدى من على سطح رقم 3!!!!

3-ده غير ان تم ظبط اكثر من سائق هبط على اسطح منزل بعد الركاب وده ( مخالف لخط السير)

4- ظبط بعد السواقين راكنين (سطح) تانى !!!

5- نشكر الاستاد المعداوى نظرا للفائض المالى الكثير ف الدولة والى اقترح علينا اننا نزود عدد الطيارات( خلينا نرفه الشعب)

6- قررنابعد قراية كومنت لواد ف موقع مصراوى بيقول" هنستغل التاكسيات القديمة والبايظة ونظبطها ونألوظها وتبقى طيارات (الويظ بالاجنحة)

ودى كانت نهاية المشروع..ونحب نقول لكل مصرى...طير انت!!

البــــوابة النــــــاطقة!!!

البــــــــــــــــــــوابة النـــــــــــــــاطقة

استكمالا للحديث عن التفكير المتخلف قلت احكيلكوا الحكاية دى


المكان:صالون بيتنا
الزمان:صيف من بتوع ربنا

اعد ف امانة ربنا اعد ع الكمبيوتر ف الصالون ومعايا بابا واحمد ابن خالى وكام حد كده مش فاكر مين....طبعا هتسالونى : هو انت اعد ف الصالون ليه؟؟؟ اقوم اقولكوا اصل مرات خالى لما بتبقى عندنا ممنوع اخرج بره عشان هى منقبة و(حرام) اشوفها وشها الملائكى...اه يا فارس يا خبيث عايز تبص على مرات عمك الحسناء!!!!!!!!!!! عامة مش موضوعنا

اعدين ف امانة الله وفجأة جت سيرة يوم القيامة والشيخ محمد حسان طالع باين على قناة الناس يتكلم عن علامات يوم القيامة وده كان على لسان احمد ابن خالى

انا:ياعم ده شغل دعايا من القناة لسه فاتحة وبتاع انا مالى علامات ولا مش علامات مانا درستها وعرفناها من واحنا ف حضانة وابتدائى هى شغلانة !!!!!

احمد: لا لازم تعرفهم ده حاجات مهمة طب تعرف تقولى انت ايه هى العلامات؟؟

انا:ف علامات صغرى وعلامات كبرى كيت وكيت وكيت وكيييييت......الخ

احمد: لعلمك بقى انت نسيت اهم حاجة!!

انا:ايه يا حسنى نسيت ايه؟(هو اسمه احمد حسنى انا بقوله يا حسنى)

احمد: الرسول قال ان الحديد هيتكلم وده حصل فعلا( احمد ده ف هندسة!!!)

انا(بتبريقة): يابن الايه يا لذينة!!! تصدق انا وانا جاى من بره امبارح وفتحت البوابة ولسه طالع السلم سمعت صوت بيقولى(وكان صوت حديدى كده مصدى)" يا فارس(وسكت كده شوية)...اقفل البوابة عشان مامتك متزعقش ليك" انا قلت جايز انا بتخيل يعنى وقفلت البوابة

احمد: انت بتتريق؟

انا: لالا اتريق ايه..طب لعلمك انا من يومين شفت سيخين حديد بيجروا ورا بعض وواحد منهم كانت هتشيله عربية لول التانى قال للاول:حااااااااااااااااسب

احمد: لا مش كده...ده حصل دلوقتى بالميكروفون..لان الميكرفون فى قطعة حديد كده جوا لولاها الكلام ميطلعش منه

بابا:حقى والنبى ده كلام واحد ف هندسة!!

انا: والله ياحمد على اد معلوماتى ان جوا بيحصل مجالات مغناطيسية وبيتحول نوع طاقة الى هو صوتك لطاقة تانية الى هى التيار الكهربى بفضل حتة الحديد مقلناش حاجة لكن مش معناه ان الحديد بيتكلم !!!!!!!!!!!!!( بغض النظر كلامى كان صح ولا غلط بس اهو الفكرة هو تحويل نوع طاقة لنوع تانى)

احمد:طب ما ده معناه ان الحديد اتكلم اهو!!!!

بابا:يابنى عيب يابنى عييييب الكلام الى انت بتقوله ده انت مهندس :S

وكلمة من هنا على كلمة من هنا ان احمد ابن خالى يفهم ويقتنع الى ف دماغه ف دماغه..

الخلاصة: ماتعمل الخير ياعم ف دنيتك والعلامات تيجى زى ماتيجى!!!!!

ملحوظة 1:الحقيقة انا معرفش اصل الكلام الى هو قاله صح ولا غلط بس تفسير الكلام ميدخلش العقل

ملحوظة2:الى هيشتم ويهاجم ويقول انى بهاجم الدين ومش عاجبه كلامى مش هارد عليه احب اقوله مقدما بس(طظ فيك)

ملحوظة3: قد يكون ده هو التفسير الوحيد لان عز مغلى الحديد..الراجل بيبيع حديد بيتكلم يا رجالة

اسيبكوا مع فكرة عمل المكرفون ببساطة

**هي أنه عند استخدام قطعة من الحديد كقلب ملف حلزوني فإنها تتمغنط بفعل المجال المغناطيسي الناتج عن تيار الملف, وتكون محصلة المجال المغناطيسي عبارة عن مجال التيار المضاف إليه مجال الحديد الممغنط, فإذا تحرك ملف داخل كمجال مغناطيسي قاطعاً لخطوط القوى المغناطيسية, نتج عن ذلك تيار كهربي,

ابقوا خلوا بالكوا بقى من بوابات بيتكوا

بـــــــلبـــطة الــــديــــــــــن!!!

كان زمان..وانا صغير اسمع ماما تقولى: صلى عشان ربنا يحبك وتبقى بتحب ربنا..وساعات تانية تقولى: متكدبش عشان يبقى بتحب ربنا....

كان زمان اسمع بابا يقولى: عامل الناس كويس عشان يحبوك وتبقى بتحب ربنا... كنت اسمع برضه: متبقاش بخيل وانانى ولو حد طلب منك حاجة ادهالو عشان ربنا يحبك...

يعنى م الاخر كنت اعرف ان عشان ربنا يحب الانسان لازم يكون اخلاقه كويسة صادق..كريم..ملتزم بدينه....الخ...لغاية ما ظهر من فترة معايير تانية عشان تحب ربنا وربنا يحبك....طب ايه هيا المعايير دى؟

**لما تبقى اعد فى امانة ربنا يادوب لسه ضارب كارت بعشرة لموبايلك ومزاجك عنب مش معكنن مزاجك غير ال 6 جنيه الى انت سالفهم من فودافون بعد ما يخصموهم ف يجيلك رسالة كالاتى.."لا اله الا الله..لو بتحب ربنا ابعت الرسالة دى لعشرة " ..عشرة يعنى طار منك نص الرصيد ياعينى وايه يعنى ياعم طيرلك اتنين جنيه ونص بس ربنا هيحبك :D

_________________________________***________________****__________

**لما تبقى اعد ع الفيس وتلاقى notifacation والافكار تلعب ف بالك ياترا مين؟ يا ترا مين؟تفتكر البت سوسو بتعاكسنى؟ ف تلاقى" Abdel salam posted somthing on ur wall" ...تدخل هوا وتشوف عبد السلام كاتبلك ايه... وتلاقى المفاجأة " قال رسول الله صلى الله عليه وسلم..... لو بتحب الرسول اعمل بوست دى لعشرين واحد!!

اما لو مبعتهاش للاسف ف الشيطان ابن الشيطانة لعب ف دماغك وطلع حب الرسول من دماغك :( وللاسف تكتشف ان الحديث مش صحيح اساسا :S (عشان تبقى تفكر ف سوسو تانى يا عدو الله يالى مبتحبش ربنا :D)

_________________________________***________________****__________

**اعد(تأزأز لب) وبتتفرج على فيلم وتلاقى رسالة" ان الشيخ سميح الاعور شاف فى الحلم الرسول جايله وقاله : يااعور... ابعت ل 90 واحد من عندك لا اله الا الله عشان تسمعوا خبر حلو ويا ويلكو يا سواد ليلكوا لو مبعتوش هتسمع خبر اسود من قرن الخروب!!! على راى المثل يدى الحلق للى مالا ودان الراجل اعور وبيشوف حاجات ف الحلم :D

*والحقيقة اخر حاجة شفتها من الكلام ده كان الاتى"عايزتعرف انت بتحب ربنا ولا لآ ؟؟؟ بص معايا قول : لا اله الا الله محمد رسولالله ..لو كنسلتها يبقا انت مش بتحب ربنا.. لو بعتها لاى حد عندك يبقا انتالحمد لله مسلم وبتحب ربنا"

*ويا حلاوتك لو عملت بوست ل 20 واحد وقام جايلك رسالة من الفيس انك spammer ويتوقف اكونت الفيس!!! عادى ياعم طظ ف اكونت الفيس المهم انى بحب ربنا

_________________________________***________________****__________

*تحول الحب الذى يكمن ف قلبك الى كلمات بيتعملها Copy &Paste ...تحول التدين وانك تبقى ملتزم بدينك والاخلاق الى اشياء شكلية زى حتة القماش الى تدعى الحجاب...الدقن...البنطلون القصير..اما غير كده فانت متعرفش اى حاجة ف دينك..

للاسف بقى الدين هو دين "الاشكال والمظاهر" تحول الحب الباطن الروحانى الى جواك الى مسج بتبعتها من غير متقراها اصلا!!! خرج حب ربنا من قلبك ليتحول الى شعارات فارغة زى (الحمد لله ياعم ده انا مسلم!! او الحمد لله ياعم ده انا مسيحى!! رغم انك مبتعملش اى حاجة من تعاليم دينك الى انت بتقول الحمد لله عليه...تحول الا انى واد زيى لما ينقض حاجات غلط هيجيلوا كومنتات تقوله كلامك غلط وان حرام عليك الى بتقوله ده ويسالونى بسذاجة(انت مسلم يابنى؟)..الحقيقة ان الناس بتخاف..بتخاف من ربنا بس للاسف بتخاف منه عشان متعرفوش..

ده بقى بالظبط زى السمكة لما تطلعها من بره البحر تعد (تبلبط) شوية وبعد كده تموت..اتوقع ان ده هو (بلبطة الدين) الى هيموت مفهومة الحقيقى مننا بعد ما خرج من قلوبنا!!!!

بمناسبة السمك والبحر:اكيد الاخطبوط بول ابن اللاعيبة ده بيعمل الحاجات دى ف ربنا بيحبه وبيخليه يتوقع صح!!!

اخيرا لو بتحبوا ربنا اقروا النوت دى واعملوا كومنتات كتير :D الى هيوصل ل 10 كومنتات يبقى بيحب ربنا 10% وهكذا بقى :D ...نشوفكوا النوت الجاية...

الفرق بين الفيس بوك والحكومة

الحقيقة فكرة الموضوع بتاعت صديقة صحفية اختفت اخبارها من فترة طوييييييلة ف ياريت تسامحنى

على انى خدت فكرتها

1- الفيس بوك يعرف عنك كل حاجة...الحكومة متعرفش عنك حاجة (لا مواهبك ولا مميزاتك ولا اى حاجة حلوة) بتعرف مصايبك بس( ولو معندكش تعملك مصيبة)

2-الفيس بوك بيعملك خصوصية (privacy)... الحكومة بتنتهك الخصوصية دى

3-الفيس بوك بيسمحلك ب 5000 صاحب فى (friend list).. الحكومة لو قفشتك مع اتنين

اصحابك فى شقة تقبض عليكوا

4-الفيس بوك مش بيراقب الشات بينك وبين اصحابك..الحكومة بتراقب كل مكالماتك فى

التليفون

5-الفيس بوك بيكسب فلوس مننا..الحكومة بتسرق الفلوس مننا

6-الهوم بتاعك فى الواقع ممكن يدخل عليك اى حد..اما الفيس بوك ف هما اصحابك بس(مهو

ممحدش سمع عن قانون الطوارئ فى الفيس!!!

7-الفيس ممكن تعمل لايك(like) على اى حاجة..الحكومة مبتعملش حاجة حلوة يتعمل عليها لايك

8-الفيس ممكن يخليك ترجع ف كلامك يعنى عاملة اوبشن (dislike) او تعمل لنفسك

(remove) من جروب او تاخد رايك فى الاستايل الجديد..اما الحكومة مش سايبة لسعادتك اى

رأى فا مثلا لو قلت انك (dislike) الحكومة فا معتقدش انك هتشوف(فيس) حد تانى فى ايامك

الى جاية (بالمناسبة انا لايك الحكومة ده بس كلام شقاوة منى)

ملحوظة:ساعات بكدب!!!!

9-الفيس ممكن تنشر عليه كلام زى الى انا كاتبه ده وتبقى ضامن بنسبة مثلا 50% او اكتر انك

مش هتتجاب من قفاك...اما الحكومة لو نزلت مقال زى ده فى الجورنال تبقى ضامن 100%

وحاطط بطيخة صيفى ف بطنك انك هتتجاب من قفاك

يوميات معيد اسنان

يوميات معيد

المكان:ادام بيت المعيد

يلتف الكثير من الناس... تختلط اصواتهم وكلماتهم..فا تسمع حسبى الله ونعم الوكيييل...مش عراف هنقوله الخبر ده ازاى للدكتووور ده كان عزيز عليه....البقاء لله....الخ

استمرت هذه اللمة لغاية ما لمحوا المعيد جاى من بعيد..احد الناس الى واقفة:بس بس يا جماعة الداكتور جه

المعيد:سلام عليكم...فى ايه يا جماعة؟؟

عم سعيد البقال:وعليكم السلام...دااكتور شد حيلك وامسك نفسك كده...البقاء لله

المعيد:ايه؟ ايه؟ ابويا اتوفى؟

عم فوزى الكناس:ياريت

المعيد:امى؟ لاااااااااا

عم على صاحب سنترال الموبايلات:لا يابنى حاجة اصعب...نحب نقولك ان...ان...البالطو بتاعك اتسرق من البيت امبارح

المعيد: ايه؟ ال.. البا.... الباللطوو؟؟ واغمى على اخينا

فجأة يستيقظ المعيد من النوم نظر الى جانبه للقى البالطو جمبه ع السرير وقال:الحمد لله الحمد لله حلم اعوذ بالله من الشيطان الرجيم
بص ع اليمين( ع الكوميدينو) لقى صورته هو والبالطو(كان عامل للبالطو قرنين فى الصورة زى ما بتتصور انت وصاحبك)

نقطة نظام وشوية معلومات:حجرة المعيد تحتور على اكثر من صورة للبالطو
البالطو هو الزى الرسمى للمعيد فى جميع المناسبات(حتى لو فرح بيبقى لابسه فوق البدلة)


وده ياخدنا للمشهد التانى

المكان الشارع والجامعة
الزمان:7 الصبح(عنده سكشن 8)

يرتدى المعيد البنطلون والقميص... ومرتديا البالطو الموقر منذ لحظة خروجه باب المنزل..
يمر يوميا بعم فوزى ويقوله:صباح الخير يا داااكتوووور؟ طبعا اخينا يسمع كلمة داكتور من هنا وينشكح من هنا(ده دكتور بقى اعلى درجات العلم والدماغ)...
مارا بعم سعيد البقال ابو سنة مكسورة:صباح الخير يا دااكتورنا...يزداد (داكتورنا) فرحا ده مش اى حد ده... مارا بعم على بتاع سنترال الموبايلات:صباح الفل يا داكتيونا(عنده لدغة فى الراء)...ذهب الدكتور وقرب من عم على وقاله:انت عندك الراء بايظة..اكيد ده بسبب مكان السينترال انسايزور مكانهم مش كويس... رد عم على ايوا والله السنترال بتاعى مكانه مش عاجبنى مش على الناصية كده يا دكتورنا..ضحك داكتورنا وقاله متخفش متخفش تعالا عندى الكلينك(طبعا الدكتور لما يقول كام كلمة انجليزى يبقى ده راجل محصلش)...يكمل الدكتور الطريق للجامعة مرتديا البالطو طبعا الى مش بيفارقه ابداااا

المشهد التالت
المكان:السكشن
الزمان: 8 الصبح(طبعا الدكتور بيوصل فى ميعاده ولو وصل بعد معاده يبقى انت الى جاى بدرى اكيد هو مش هيتاخر)

يدخل الدكتور فا يلمح طالب بيزرر زرار البالطو الى فوق(شوفو قوة الملاحظة ده دكاترة بتشوف الملى فى السنة مش هتشوف الزرار الى بتاع 2 سم)

الدكتور بغضب:انت يابنى يالى بتزرر اخر زرار فى البالطو تعالى هنا

الطالب:ايوا يا دكتور

الدكتور:مش احنا قلنا ممنوع تلبس البالطو فى السكشن؟

الطالب:اصل..... والطالب ياعينى ملحقش ياكمل كلامه قاله الدكتور:يالا بره البس البالطو بره

الطالب يشرع فى قلع البالطو عشان يلبسه بره نده عليه الدكتور:انت يابنتى انت هتقلع البالطو جوه السكشن كمان اقلع بره

الطالب فى عقل باله(يخربيت الرخامة)..يقلع الطالب الغلبان البالطو بره ويلبسه تانى ..ارتدى الطالب البالطو ودخل السكشن نده عليه المعيد تانى:انت يا دكتور يالى داخل..ايه مفيش احترام؟مش تخبط ع الباب الاول؟

الطالب:انا اسف يا دكتور

المعيد:يالا اطلع بره خبط وادخل تانى

الطالب فى عقل باله(وحياة امى اديك بالكاست فى وشك):حاضر يا دكتور

المعيد:مش عايز صووووووت هانده الغياب واياك اسمع صوت موتور ولا نفس واحد...بدا المعيد ياخد الغياب وقال:احمد عب السميع

احمد:انااااا

المعيد:انت بتعلى صوتك ليه؟انا مش قلت مش عاوز صوت؟ ده حاجة غريبة والله...احمد عب المنعم

احمد بصوت هادى :انا

المعيد:ما تعلى صوتك يا خويا شوية الله مش سامع...بعد كده هانده الاسم مرة واحدة والى مش هسمع صوته غياب والى هسمع صوته عالى غياب برضه....

خلص الغياب وبدات تختلط اصوات الطلبة باصوات الموتور والكونترا..وامامهم ششلة من المعيدين اعدين يحكوا ويرغوا..فجاة يوم المعيد:انت يابنى انت وهو؟جايين نتكلم ولا جايين نشتغل؟مسمعش صوت يا سنة تاسعة...تسكت الطلبة وفى هذا الحين المعيدين نازلين رغى ولت وعجن وضحك يعنى هى جت علينا كطلبة يعنى لما نتكلم واحنا شغالين؟؟؟

بعديها يروح طالب للمعيد:دكتور شوفلى الكافيتى cavity

المعيد بنظرته الثاقبة:لالا ده ديب اوى ده بتاع 4 مل ايه ال cafity ده( cafity وليس cavity

الطالب: ده بالبروب 2 مل

المعيد:لالا البروب ده بايظ هات واحد تانى

راح نفس الطالب لمعيد اخر:شوف كده يا دكتور الكافيتى ده

المعيد الاخر:لالالا شالو اوى انزل كمان شوية

الطالب:تؤ طب وبعدين بقىىىىىىىىىىىىى والله لاعد ومنا شغال حاجة...

واحد قال لزميله:انت مش كنت مقلب السنة بتاعت الديمو المرة الى فاتت؟

رد التانى:ايوا

قال الاول:طب اشطة هاتهلى وانا هاروح للمعيد اساله عليها

راح الطالب وسال الدكتور:دكتور السنة دى كده كويسة؟

الداكتور:ايه يابنى القرف ده لالا اعمل رونديشن هنا..وكمان الاوتلاين باظ ده ايه ده حمار شغا فى السنة؟

الطالب : اه حمار يا دكتور معلش

شوية حاجات ع السريع:

1-ممكن اوى تطرد عشان لابس كاب
2-اه واه لو شعرك طويل تسمع بقى احلى كلام من المعيدين...ههههههههه ايه ده شعرك عامل كد ليه؟انت سوسن؟ لا ياخويا شويكار. ومش بعيد دكتور يقولك هانقصك فى الشفوى لو محلقتش
3-ياسلام لو لابس لون غير الكحلى والاسود والابيض لابس بمبى مثلا...ها هاهاهاااى ايه ده تى شيرت بمبى؟جايبه منين من محل بنات؟
4-لما تلاقى الطلبة (بلموا فى السكشن) يبقى حاجة م الاتنين يا بيشرح واحد ممل واعد يتكلم ويلزق الكلام فى بعضه(سمك لبن تمر هندى) يااما بيشرح ليهم معيدة(مزة الى حد ما) وده شيء متلقهوش كتير فى الجامعة دى
5-لما تحل كويس فى الامتحانات والدكتورة تنقصك نص الدرجة عشان انت مزود فى الاجابة عن نموذج الاجابة يبقى انت اكيد فى الابتدائية مش فى جامعتنا
6-لما تلت تربع البنات اسمهم بنات فى البطاقة بس...بلاش نلبخ فى الجنس الى مفروض لطيف....
7-لما تجاوب كويس ف الشفوى والدكتور يفكر انك بتتحداه ويسالك اسئلة تعجيزيه زى مثلا الكاست ده بتاع واد ولا بت؟طب الكاست ده صاحبه كان اسمه محسن ولا عمرو ولا غير ذلك؟ حاشا لله مش فى جامعتنا
8- لما تقول رايك بصراحة فى هلاهيل زى الى انا كاتبها دى يبقى انت من تعداد الساقطين...لالا مش جامعتنا ابدا

فجأة صحيت م النوم(ده الى هو انا) وشى اصفر ومخطوف ,اكتشفت انى بحلم انى بكتب الحاجات دى وانا يتردد فى اذانى كلمة سااااقط سااااااقط(زى جواز سعيد من فريدة باطل كده) وقلت:ياساتر يارب فى جامعة بالشكل ده؟الحمد لله انا فى طب اسنان المنصورة معندناش اى حاجة من دى!!!!!