اليوم الاول من يوميات متبهدلين!!!

لزيارة المقدمة اضغط هنا

اليوم الاول
(او كما اسميه يوم الدم التقيل)

المكان:بيت خالتى فى المنصورة
الزمان:السبت بداية الاسبوع واول يوم فى الجامعة

رن منبه موبايلى مشيرا للساعة السابعة تقريبا ومشيرا ايضا الى انى المفروض اقوم لملاقاة اول يوم ليا فى الجامعة..استيقظت مقروفا من حياتى لانى مكنتش بنام بدرى فى الاجازة
على عكس الاجازة دى تماما المهم انى استيقظت بالعافية ولقيت خالتى صاحية وقالتلى:اعملك تفطر يا حمار؟؟

انا:صباح الاحترام يا طنط ياااااااطنط انتى بتكلمى دكتور عيب كده

خالتى:دكتوووور؟ياخويا اتنيل

انا بضحكة خفيفة:عموما لا مليش نفس انا هالبس وانزل اشوف هاهبب ايه النهاردة فتحت الدولاب نقيت التى شيرت المفضل ليا الابيض والبنطلون الجينز ولبست الكاب ونزلت

** نقطة نظام:مادام لقتونى لابس الكاب يبقى انا مكتئب على طول

المهم هبطت درجات السلم متثاقلا كسولا لتبدا معركة ما قبل الكلية وهى معركة التاكسيات عدى عليا اول تاكسى وكان فاضى تماما وسالت سؤالى الى تكرر طوال مدة الدراسة بوابة علوم؟

حقيقة ان انا طول السنة بسبب ما شاهدته من ايام فى علوم ببقى نفسى اقول لكل السواقين والله انا فى طب اسنان بس الزمن هو الى رمانى هنا المهم شاور سواق التاكسى بقرف لا



انا فى عقل بالى:وده ايه ياخويا الغلاسة دى يابن ستين فى سبعين.....المهم ان محاولاتى نجحت فى نهاية الامر فى ان استقل تاكسى الى الكلية العظيمة علوم وذهبت لمصيرى المجهول

سواق التاكسى بفضول زايد حبتين:انت فى كلية علوم يا باشا؟؟؟

انا:لا والله طب اسنان بس السنة الاولى اعدادى (وحكيت الحكاية الى حكتها مالا يقل عن 100 مرة فى السنة )

السواق وكان شابا:ربنا معاك

انا:الله يخليك

السواق:انا اداب على فكرة

انا فى عقل بالى(يادى اليوم الى هنصدع فيه من اولها) المهم جاوبت وعملت انى منبهر:يارااااااااجل؟اداب؟

السواق :اه ولله بس والدى بقى قالى على حكاية التاكسى دى و و و و و...................... والراجل اعد يلك ويحكى وانا ودن من طين وودن من عجين كان ناقص اعمل زى اعلان ميلودى
وع الصحراوى ياسطى.....وما ان وصلت عند بوابة علوم ونزلت من التاكسى ال سواقه تقريبا مسكتش طول الطريق لاقابل اول عقبة ف يومى لقيت الناس كلها داخلة ببطاقات الترشيح

انا:وده ايه الهم ده ده انا بطاقة الترشيح فى المنزلة اساسا...فكرت قليلا وجه فى دماغى كريم

اخرجت الموبايل من جيبى واتصلت بكريم او (كيم كما اناديه)

رد كيم بصوت نائم:سلام عليكم

انا: وعليكم السلام ايه ياد انت فين؟؟؟

كيم:انا فى الطريق اهو بس كنت نايم

انا:ادامك اد ايه؟؟

كيم:لا لسه نص ساعة كده

انا:طب اوك لما تيجى قولى بقى

كيم:ماشى يا برنس

انا : يلا سلام

انا مرة اخرى:يادى النيلة طب اعمل ايه؟؟جه فى دماغى واحد صاحبى اسمه شادى اتصلت بيه ومجمل المكالمة ان كان ادامه 10 دقايق وييجى

انتظرته فى البوابة وماهى الا دقائق وجه

شادى:ايه ياعم فارس عامل ايه ؟

انا:شووووووووووش(كما اناديه برضه) كويس والله ايه اخبارك؟

شادى :تمام الحمد لله امال ايه مدخلتش ليه؟؟

انا بضحكة ساخرة:ادخل فين بقى معييش بطاقة ترشيح

شادى:امال هتعمل ايه؟؟

انا: قلتله والله الراجل الى واقف بره ده شكله مبيعرفش يقرا اساسا اى ورقة ادامه وهوب بيدخل اى حد فا انت هتدخل عادى وتدينى بطاقتك من بين السور وهادخل بيها

شادى:افرض كشفك؟

انا:قلتله ياعم سبها على ربنا والله ما بيشوف حاجة

دخل شادى وامرر لى بطاقة الترشيح من بين السور ودخلتها بسلااااااااااااااام(ويارتنى مادخلت)

وماهى الا دقائق اخرى حتى قابلت محمد سليم(صاحبنا ايضا من المنزلة)اقبل علينا بلحيته القصيرة(والنبى ياخوالنا محدش ينسى يقول انى بستهزء)اقبل وقال: سلام عليكم

انا وشادى ردينا السلام ثم استكملت قائلا:سيووووووووووووووووووووووسى ازيك؟

سليم بعد ان قبض على يدى:قلتلك معتش تقول الكلمة دى

انا:خلاص يا سليييييييم بهزر معاك بدلعك يااخى

انفصل شادى عنا فى ظروف انا مش فاكرها وفضلت مع سليم

قلت:الا قولى يا سيو..... قصدى يا سليم متعرفش دفع المصاريف فين فى اسنان؟؟

سليم: اه عارف

انا:طب تعالى معايا اما اروح ادفعها خلينى اخلص

رحنا ودفنا المصاريف بعد ان حرقتنا الشمس بلهيبها واشعتها(الالترا فيوليت والانفلا ليد قصدى الانفرا ريد على راى الحاج فكرى) وفى طريق اعودة قابلت كريم وكان معاه واحد من ارخم خلق الله بس معرفش الواد كريم بيحبه ليه

المهم دخلت عليه كيييييم ازيك؟

كريم بكلمته المعتادة:ابو فارس يا غالى

انا:انت جيت امتى ياد؟

كريم:يعنى من حبة كده ثم بدأ كريم يرخم على سليم(من واحنا فى الثانوى كيم لازم يضايق فى سليم)

انا:طب يالا بيقولوا علينا حاجات الساعة 12 تعالا نروح هناك ونشوف فى جدول ولا نيلة وايه

ذهبنا انا وكيم وسليم والشخص الغريب الى كان معانا الى مكنتش طايقه وفى الطريق قابنا شادى ذهبنا لعلوم انفصل عنا شادى وسليم وفضل ثلاثتنا وكانت البداية مع دكتورة امورة

قابلنا دكتورة امورة دخل عليها كريم وسالها هو جدول اعدادى اسنان فين؟

دكتورة امورة بظرافة ولطافة وخفة دم معهودة:ايه ده انتوا مين يا بابا؟

رد الشخص الظريف:احنا عايزين نعرف مدرسة علوم فين

انا فى عقل بالى:يا خفة دم اهلك

ردت د/امورة وكان خلفها واحدة فا اتجهت لها وقالتها:اه شايفين بقى واحدة امورة جايين يعاكسوها

انا فى عقل بالى برضه:لا خفيفة اوى

رد كريم:لا يعنى سماحة بس(ومننساش الكلمة دى هتفيدنا ادام)

كرر عليها الشخص الظريف كما اسميه :هى فين مدرسة علوم؟؟؟

ردت الدكتورة:مدرسة ايه يابابا انت كبرت خلاص اسمها كلية (وبعتيييين) يالا امشو امشوا مش فاضية بقى وانصرفت دكتورة امورة

انصرفنا وما هى الا ثوانى حيث قابلنا الاخ(شهاب)من اسرة النور(اخوان مسلمين)وماهى الا ثوانى اخرى حتى وجدنا شادى وسليم المهم كان شهاب لابسا بدلته السوداء

اوقفناه وسالناه:امال فين جدول اعدادى اسنان؟

الراجل عاملنا كويس ودلنا وحكى معانا شوية وقال فى محاضرة للعميد تقريبا دلوقتى

انا:يعنى ليها لازمة ولا اى كلام ويعد يقول متكسروش الأزاز وزاكروا والكلام بتاع ناظر المدرسة ده؟

شهاب: لا ملهاش لازمة

انا: قلت اشطة يبقى نخلع

وفجأة اخرج من جيبه كروت وقال ياريت ياجماعة نملى الكروت دى

كان كارت ابيض مكتوب فيه الاسم ورقم التليفون وشوية معلومات كده وفى الاخر مع تحيات اسرة النور

انا فى عقل بالى:اخوان من اولها اول يوم ليا فى الكلية هانضم للاخوان هيهيهيهيهيهييييي يا حلاوة

كريم غمزلى وقام خالع وانا تظاهرت ان موبايلى بيرن واستاذنت وخلعت

كريم بابتسامة:تعالى ياعم بلاوجع دماغ

انصرفت انا وكريم وانتهى اول يوم فى الكلية العظيمة بلا فائدة تذكر ودى كانت بداية ايامنا فى الكلية يمكن مفيهوش ضحك كتير بس لسه زى ما بيقولوا التقيل ورا
لسه هنتعرف ع الشلة
يعنى انتظروا المزيد

دمتم بود

صناع الجيل والايحاءات الجنسية!!

صناع الجيل هم من يتحكمون فى جيلنا او اى جيل فى لبسه فى شكله فى كلامه ونحط تحت كلامه دى مليون خط

ومن اهم صناع الجيل فى وقتنا الحالى سى تامر حسنى الذى يصر على الخروج فى افلامه(بالبوكسر)بل وامتد الامر الى الايحاءات الجنسية فى اغانيه

تبدأ هذه الايحاءات فى اغنية(اعتذرلى للى هيجيى بعدى.......... قائلا اخدت كل حاجة فى عهدى)

امتدت الايحاءات والفكاهات الجنسية فى فيلمه الجديد او كليبه الجديد فى اغنية اكتر حاجة حينما يظهر(نجم الجيل)وهو يقول (اكتر حاجة بحبها فيكى هو ده هو ده ويسكت قليلا ويقول اااااااه قلبك)ماعلينا ياعم مفيهاش حاجة احنا الى نيتنا وحشة

لا وعندما استضافوه فى اف ام(100 فاصل 6 يقلك الناس بتفهم غلط)
(حفظك الله يا تامر وحفظ نواياك السليمة)

طب نيجى للحتة التانية يقول(واكتر حاجة شدتنى ليكى هى دى اه هى دى ويسكت قليلا ويقول طيبة قلبك)المشكلة انه فى فيلمه الجديد(كابتن هيما ولا كابتن ابو جريشة)انه يقول اكتر حاجة شدتنى ليكى هى دى ويقوم بالنظر الى مؤخرة الفنانة المحترمة زينة الى طبعا تقوم بتمثيل الكسوف وتضحك فى الكليب وبالتاكيد هذا يدل على الاحترام والكسوف والحياء

(متربية ياجماعة والله الواد تامر ده الى ربنا يجازيه واد شقى)


لم يتوقف الامر عند هذا الحد بل فى اغنية اخرى بيقول(لان حبك اتاخد قفش)ويقوم بحركة بيده تدل على السفالة


لا والاغرب ان واحد صاحبى قالى معلومة عجيبة اوى بيقولى كان فى اغنية والرقابة رفضتها خوفا على مشاعر المراهقين رديت عليه قلتله :لا والله فيهم الخير بالفعل رقابة فيها الخير تحافظ على مشاعر المراهقين وعلى الحياء


عموما نحن فى انتظار باقى ايحاءات سى تامر (نجم جيلنا) ولا عزاء لاصحاب الزوق الرفيع وفى نهاية مقالى بندعى لتمورة بالنجاح والتوفيق ويزدنا من ايحاءاته الجنسية وما خفى كان اعظم فى بقية البومه الجديد والبقاء لله فى الحياء


دمتم بود

مقدمة يوميات متبهدلين

*اولا سلام عليكم


*دلوقتى ياخوالنا الواحد دخل كلية طب اسنان طلع عينه من الدكاترة وشاف ايام سووووووووودة فا باختصار هنتكلم عن مغامارات الكلية

*تعالوا نتفق على حاجة هاعمل حاجة اسمها نقطة نظام بمعنى لو انا بحكى فى الموضوع اهو وبدات احس ان فيه لخبطة او جبت اسماء كتير محدش عارفها مثلا هاكتب حاجة اسمها
نقطة نظام واوضح وياريت نطبقها فى مناقشتنا بتبقى جميلة اتعلمتها من بابا وناس اصحابه اثناء كلامهم ومناقشاتهم(هتفهموها اكتر فى الموضوع)

دلوقتى هنبدأ بمقدمة كده شخصية لحد كبير.....اسيبكم مع المقدمة بعنوان

يوميات متبهدلين

الزمان:فى الصيف
المكان:عشتنا فى راس البر


كنت نائما كعادتى وكانت الساعة 6 مساء تقريبا وقتها سمعت هيصة وزمبليطة من بابا وابن خالى وواحد صاحبى وسمعت زى ما بيقولوا(طراطيش كلام انى دخلت طب اسنان)

نظرت بنص عين لباب الغرفة(الموارب)وقلت:تؤ يادى النيلة عايز انام يا اخوالنا.....لم اكمل كلامى ولقيت الباب(بيترزع) والواد ابن خالى داخل بجسمه العريض المفتول
قائلا:مبروووووك يا(بسبس) دخلت طب اسنان


نقطة نظام:بسبس دلع احيانا ماما وبابا بيقولوه(محدش يعلق ع الكلمة عشان معلقوش)

نظرت باستغراب وقلت:عبده مش فايقلك وحياة جدك ال19 سبنى انام....برضه لم اكمل كلامى حتى دخل الحاج الوالد وقالى قوم يا دكتوووووووور دخلت طب اسنان

قلت فى عقل بالى:يافرحتى هابقى دكتور للاسف المهم قمت من ع السرير وقلتله ده حصل امتى ده؟؟؟

قالى اهو بعتولى مسج وادانى الموبايل وقرأت:بوابة الحكومة تهنئكم بكذا كذا كذا

انتابنى وقتها شعور غريب ما بين الفرح بما انجزته فى الثانوية العامية لان كنت بطبيعة حالى مبزاكرش 3 ساعات على بعضهم فى اليوم

والشعور الاخر

كان حزينا لانى بطبيعة حالى كنت عايز ادخل هندسة.....ياخبر اسود هندسة امال ايه الى دخلك احياء فى تانية يا موكوس؟؟لا حكاية هاحكهالكم بعدين

المهم قمت سعيدا (مزأططا) مش معقول كل الى حواليا فرحانين وهاكشر

قلت لبابا باستعباط:شفت بقى عشان تعرف انى كنت بزاكر كل شوية تيجى تقولى مبتزاكرش

بابا:والله يابن الكلب انت ماكنت بتزاكر ولو كنت بتزاكر كنت جبت الاول ع الجمهورية

انا:يابابا ياباباااااا بلاش غلط

قام بابا وباسنى بوسة ابوية وطبطب عليا وقالى جدع ياالا يافارس كنت خايف متدخلش حاجة بس كنت وااثق برضه

انا:عيب عليك يا كبير مخلف راااااجل برضه

صاحبى(اسمه محمد نصر):اشطة يامعلم هتعزمنا على ايه بقى؟؟؟؟

انا بعد تكشيرة وبوز:اعزم؟؟؟انا اسااسسا دخلت تجارة يابنى ده بس المسج اتبعت غلط

المشهد التانى

المكان:عشتنا فى راس البر برضه
الزمان:يعنى قول 9 بليل كده قبل النتيجة بكام يوم


كنت جالسا انا وبابا والواد ادهم ابن عمى وعبد الرحمن ابن خالى وواحد صاحبى اسمه حسام واخوه وكنا فى انتظار نهائى كوبا اميريكا

عبد ابن خالى قام غامزلى.....استغربت وشاورتله بايدى كده فى ايه؟؟؟

شاورلى ع الموبايل ولقتيه كاتبلى:اكتبلى اسم ادهم كامل ورقم جلوسه

انا بصوت منخفض:ليه ياد هتهبب ايه؟؟؟

هو:هتشوف اهو

كتبت رقم الجلوس فى صمت واسمه بعدها قال ابن خالى:عمو انا نازل لمحمد عمارة وجاى

نقطة نظام:محمد عمارة هو واحد صاحبنا ساكن جمبنا وفاتح جراش كده فى بلاى ستيشن وبلياردو وبتاع

نزل عبده او كما نسميه(بودى) بعدها بدقيتيتن رن موبايل ادهم

ادهم بجسمه الهزيل:ايه ده رقم غريب تعرفه يا فارس؟؟؟

طبعا انا ترجمت الحوار المهم تظاهرت بالعبط:ايه ده لا معرفش

ادهم :يعنى ارد؟؟

انا: ايوا يابنى اخلص

ادهم رد:الو.........

رد بودى ابن خالى بصوت رسمى:الو سلام عليكم يافندم

ادهم اتلبخ وقال:وعليكم السلام

بودى:حضرتك ادهم ماهر.............الخ الاسم ورقم جلوسك ........

ادهم ودانه احمرت ووشه احمر:ايوا انا

بودى:احنا مكتب الوزير مع حضرتك وحضرتك طلعت ال 35 على الجمهورية وعايزين حضرتك بكرة فى مكتب الوزير للتكريم

ادهم بلبخة لا توصف:ايه؟؟ال 35؟؟؟

بابا واصحابنا بيتابعوا الموقف وانا بتابعه وكاتب الضحك وحاط ايدى على بوقى

بابا شاور ليا فى ايه؟؟؟

حركت شفتاى راسما كلمة:ده عبده

ادهم قفل المكالمة وخلص وقام مزعق:عمووووووووووو انا جبت ال 35 ع الجمهورية استنى اكلم ماما

بابا كاتما الضحك:استنى بس فى ايه؟

ادهم :واحد اتصل بيا من مكتب الوزير وقالى طلعت ال 35 استنى والنبى ياعمو اكلم ماما

طبعا انا فى هذه الاثناء لم احتمل حطيت وشى فى مخدة كنبة الصالة و(سخسخت زى ما بيقولوا)

ادهم يجرى اتصاالا بطنط ولسه بيقول ايوا يا مامااااااا طلعت ال 35 وجاءته الصدمة حينما قال له بابا:35 ايه يا حمار ده عبده كان بيشتغلك

لا استطيع وصف منظر ادهم ابن عمى فى هذه الاونة بعد ما ضحكنا عليه ولا نص ساعة متواصلين بعد الحكاية دى

اعد جمبى وقالى:تصدق بالله انت زبالة عشان كل مرة تعمل فيا مقلب مع حسام او عبده

قلتله ضاحكا:انت الى هفأ اتفرج اتفرج ع الماتش جتك نيلة يا عبيط

**ودى زى متقولوا كانت مقدمة بسيطة مرضتش ادخل فى ايام الكلية المرة دى حبيت اعمل زى ماقلت مقدمة وانتظروا باقى الحلقات فى القريب العاجل


دمتم بود

نظرة مستقبلية للواطى المطاطى!!!

الجزء الاول هنا
الجزء الثانى هنا
*الجزء الثالث بعنوان نظرة مستقبلية*
المشهد الاول
الزمان:سنة 2090
المكان:زنزانة7070
كنت جالسا فى زنزانتى اكتب اليوم المطاطى رقم 90563115 ماسكا لحيتى افكر فيما
ساكتبه بعد ان شاب شعرى وفجاة سمعت صوت خطوات قادمة

خطوات قد اعتدت عليها انها خطوات(الشاويش مرسى)(الحفيد ال 20 للشاويش عطية)المهم
فتح الزنزانة وقال:جوم فز يا متهم
اغمضت عينى للحظات من اثر النور القادم من الخارج وقلت:فى ايه تانى؟؟؟

الشاويش:خلاص يا خويا افراج
انا:تؤ شاويش مرسى مش عايز هزار انا اعرف جدك ال 20 الشاويش عطية فا متخلنيش
اقلك كلمة وحشة

الشاويش:وانا هازر معاك يا متهم قوم يا جدع فز الريس حسين عفى عنك وبيقول عفى الله

عما سلف

انا:حسين مين؟؟؟؟

الشاويش: يا سيدى يلا هويييناااا

المهم انى زى ما بيقولوا ما صدقت وخرجت طياااارة على بره
وفجاة والاقيلك مظاهرات وشيلين صورة الاهرامات وعليها شريطة سودة كده

انا فى عقل بالى:خير اللهم اجعله خير؟؟ووقفت واحد منهم الا هو فى ايه ياعمنا؟؟؟

الراجل زعقلى:فى اييييييييييه؟انت مش عارف انت ايه مش معانا فى البلد؟ شكلك عجوز
وخرفت

انا بابتسامة خفيفة:لا والله انا مسجون من 2008 هو مين الريس دلوقتى؟؟؟

الراجل:يوووووه عليك الريس دلوقتى حسين

انا:ايوا يعنى حسين مين؟؟؟

الراجل:حسين جمال مبارك

انا فى ذهول:حس حس حس..... حسين جمال مبارك؟!؟!؟!؟

الراجل الغلبان:اه يا سيدى باعوا الاهرامات باعووووووووووها دلوقتى الاهرامات فى اسرائيل

انا:ها؟اسرائيل؟؟؟طب وليه النهاردة بالذات عاملين المظاهرات

الراجل:النهاردة تاريخ الاحتفال بميلاد الريس بتاع زمان حسنى

المشهد الثانى

فى هذه الاونة كان حسين يجلس فى بيته يجلس على سجادة صلاة على شكل علم اسرائيل
يستمع الى مفتيه الشيخ مسعد ابو السعود طنطاوى ملقيا خطبة بمناسبة الاحتفال
بمولد(حسنى)وكان بيقول:لقد رحل الريس حسنى بعد عمر قليل حكم مصر 30 سنة فقط ويعتبر اقصر مدة
حكم فى العالم وحقق جميع الانجازات
zoro_119
كان حسين يستمع هو وسوزى(جدته تخيلوا لسه عايشة)وابوه جيمى العيان واماهم صورة
لفقيد الشباب وهم يجهشون بالبكاء

دخلت عليهم(خدوجة)بعد ما من الاخر وشها كرمش وقالت لحسين:اسم النبى عليك حارسك
وصاينك نسخة من ابوك وجدك ربنا يحميك

حسونة:ربنا يخليكى ليا يا مامى
zoro_119
فجأة رن جرس هاتف حسونة 3310(متواضع زى جده الله يرحمه ويحسن اليه)بموسيقى
النشيد الوطنى لاسرائيل فاذا به(اومو سيد نظيف)

حسونة:اوموووووووووووو ازيك ياواد(برضه لو تلاحظوا نفس الحس الفكاهى الى كان عند جده الفااتحة على روحه ينوبكم ثواب)

اومو:تمااااام الحمد لله يا سيادة الريس
zoro_119
واضاف اومو:انت ازاى تخرج الواد فارس ده واد لسانه طويل وكان بيغلط فى المرحوم جدك
وابوك العيان

حسونة:والله دى اوامر بابا جمال احنا هنسيبه يهلفط شوية كده لو عك نجيبه من قفاه وبعدين
ده بقى عنده ولا مليون سنة هيموت قريب

اومو:الى تشوفوه معاليك ياريس

حسونة:المهم جهز نفسك عشان يوم العيش العالمى بعد يومين انت عارف بقينا
55644 مليون
zoro_119
اومو:ولا يهمك يا فندم طياارات وعربيات الامن المركزى هتبقى موجودة ومحدش من الشعب
هيطول حتة عيش

حسين:تمام تماااام يلا روح شوف شغلك شالوم
zoro_119
اومو:شالوم يا فندم

ملحوظة:نظرا لان العيش معتش بييجى مصر الا يوم فى السنة فا اصبح يوم العيش العالمى

المشهد الثالث

الزمان: بعد 3 ايام
كنت جالسا على الرصيف(لان اكيد مش لاقى بيت) بجلابيتى المقطعة المهلهلة افكر فيما وصلت
اليه مصر من حالة لا يرثى لهاوفجأة سمعت صوت التلفاز فى احد المقاهى قلت:طب اما نروح نسمع الخربان ده بيقول ايه

قناة دريم ال 19 تهنئكم بحلول يوم العيش العالمى ومعانا فى برنامج السادسة صباحا
ونستضيف احد المواطنينومعانا المواطن(مطحون مسعود محمود) ياترى يا مطحون وصلك حصتك من العيش؟
بعد ادعاءالمواطنين ان الامن المركزى منعهم ومخدوش حاجة

مطحون:كلاااااام كلاااام يا ست هانم ربنا يخليه وينجحله المقاصد موفرلنا كل حاجة وانا معايا
حصتى من العيش اهو

انا ذهلت وقمت فى القهوة:ده حرااااااام ده ظلم هو النفاق ورانا ورانا

المهم الناس اعدتنى وبتاع واهدى ياراجل ومينفعش كده وبتاع
وقال احدهم:اقلب ياعم ع القناة دى هاتلنا الشيخ:محمود محمد مصطفى حسان على قناة
الشعب

ظهر الشيخ مرتديا جلابيته تتدلى لحيته امامه وقال:ان ما نحن فيه لن يحل الا بطاعة الله هذا
لاننا نسمع الاغانى ونشاهد الافلام و و و........

انا فى عقل بالى:ياعم احنا لاقيين العيش لما نروح ندخل افلام اتهد واسكت بقى


وفى وسط الحلقة قال الشيخ:ونستقبل تليفون سلام عليكم؟؟سلام عليكم؟؟

ردت فتاة:سلام عليكم الشيخ محمود مصطفى حسان؟؟؟

الشيخ:وعليكم السلام الفتاة:انا فاطمة من كوالالمبور انا بحبك فى الله والله يا شيخ

الشيخ:احببك الذى احببتنى فيه انا كمان بحبكم فى اللهالفتاة:كنت عايز اسالك يا شيخ ياترى ايه حكم لبس الكوتشيات للبنات ؟؟وهل يختلف اذا كان
توكيل ولالا؟؟؟
الشيخ:ده موضوع طويل طيب هناخد كمان اتصال ثم نجاوب على هذا السؤال حاجة تانية؟؟

الفتاة:اه ياريت انا ابنى بيكح ياترى ايه حكم انى اوديه للدكتور؟؟؟الشيخ:بارك الله فيكى فى
رعاية الله وهنجاوب

قمت ازعق تانى:يانااااااااااااااس حراااااااااااام عليكوووووووو انتو هتجننونى؟؟؟ايه الاسئلة
الغبية دى

وفجاة والاقيلك القهوة اتقلبت عليا:اسكت يا راجل انت متغلطش فى الشيخ الجليل ده اسئلة كلها
حكم وهاتك يا كلام وشتايم والاقيلك كرسى طاير ولابس فى وشى

المهم سبت القهوة وخلعت قبل مااموت وقلت فى عقل بالى(طب وحياتكم مانا سايبكم ولا سايب
حسين ده)وتوجهت اكمل ايامى المطاطية وربنا يستر

ملحوظة:ممكن يكون فى تشابهات بين الموضوع ده والى قبله ولكن الغرض توضيح ان حسين نسخة من جمال نسخة من حسنى
دمتم بود

اليوم الثانى من الايام المطاطية!!

المشهد الاول

فى صالة بيت الريس المتواضعة جدا كان الريس يستمع لمفتيه المفضل وشيخه الجليل بكلامه الحكيم الشيخ طنطاوى رضى اللله عنه
فى هذه الاونة والساعة تشير عقاربها للساعة ال 7 صباحا(الريس نشيط طبعا)دخل عليه ابنه(جمال) بطلعته البهية ودلاله مناديا: بابا صباح الخير

رد قائلا بطيبة ابوية :صباح النور جيمى يا حبيبى نمت كويس؟

رد:اه الحمد لله

الريس:امال فين دودو( خديجة يعنى انتوا عارفين الريس فكاهى)؟

جيمى:جاية اهى

الريس: اعد بقى عشان افهمك حاجة اعد جنب ابوك

جيمى:ايوا يا بابا عايز منى ايه؟

الريس:طبعا عارف ان بكرة ماتش الارجنتين ومصر؟

جيمى:مصر مين يا بابا؟؟

الريس: يووووووه الى انا رئيسها الى عايشين فيها الى شعبها اهبل ده

جيمى: ايوا ايوا انت عايزنى اشجع الارجنتين؟؟

الريس:هو بغبااااااااااااااؤه لا انا عايزك تروح وتاخد خدوجة كده وتشجع مصر

جيمى: وهاعد فى الاوضة الازاز بتاعتك والنبى يا بابا اعد فيها
zoro_119
الريس:لالالا اسمع كلام ابوك انت هتعد بره فى الهوا عشان ميقولوش عليك جبان ولا بتاع عشان تبقى ريس ديمووووقراطى

جيمى:هو انت جبان يا بابا؟؟؟

الريس:لايابنى بس انت عارف الصحفيين والشعب

فى هذه الاونة دخلت خدوجة مرتدية قميص نومها البمبى يكشف عن ذراعيها وعن حاجات تانية كتير قائلة:ازيك يا عمى ولا اقلك يا ريس(ظريفة البت هتعملوا ايه) وقبلت يده قائلة فى عقل بالها( اخلع بقى من ع الكرسى عشان جيمى اوف)

الريس: اهلا يا خدوجة كويس انك جيتى عايزك تروحى مع جيمى ماتش الارجنتين ومصر

خدوجة : عنيا ياعمى ولا اقلك ياريس(مش بقلكو ظريفة اوى)

الريس : شوفى بقى عايزك تشوفى كام ماتش كنت حاضر فيهم انا وسوزى عشان تتعلمى منها

يدخل جون تقومى تشجعى وتهزى العلم وكده بقى ابقى اعدى مع حماتك تعلمك

جيمى : الا قولى يا بوب هو انا هاعرف احكم مصر دى؟

البوب قصدى الريس:امال انا بعمل ايه منا اعد بعلم فيك اهو...الا قولى الاول

جيمى:اقول ايه؟

الريس:مفيش حاجة كده ولا كده فى الطريق؟؟؟

جيمى:طريق ايه؟

الريس بغمزة:يعنى واد صغنون كده عشان نضمن الريس الى بعدك

جيمى:لا والله لسه محصلش نصيب

الريس:الله يكسفك منتاش زى ابوك ابدا

جيمى:فى عقل باله زيك ايه انا خايف اكون ابن اونكل صفوت ولا حاجة)

جيمى مستعدا للنهوض وقال:يلا انا رايح الحزب اطنطط عليهم شوية واشوف الاخبار

الريس:طب يابنى ربنا معاك

**ملحوظة:طبعا جيمى اعد مع ابوه عشان فى ازمة سكن والواد مش لاقى مكان يعد فيها

المشهد التانى

استقل جيمى سياراته من فئة فيات 128 على الوانها شكل علم مصر( ابوه معلمه التواضع)وخلع ع الحزب

zoro_119
وفجاة لقى متظاهرين ورغيف العيش واسلاميه اسلامية وبتاع فاتصل جيمى بالوالد

الوالد اعد بياكل عيش وجبنة وفجاة رن موبايله:بلادى بلادى بلااااااااااااااادى فا بص لقاه جيمى

رد قائلا: ايوا ياجيمى يابنى فى ايه

جيمى:فى ايه يا بابا فى العيش؟الناس بتقول ازمة عيش وبتاع هو احنا مش عندنا عيش؟؟

الريس:عيش؟؟مين قال فى ازمة عيش؟خلاص خلاص هاتصل بنظوفة(نظيف)اشوف فى ايه

نادى الرئيس قائلا:خديييييجة خدوووووجة

جاءت خديجة:ايوا يا عمى ولا ااقلك ياريس؟؟(يخربيت خفة الدم)

zoro_119
قالها ملينى نمرة نظيف

ردت:وياترى بيغسل باومو ولا تايد( ياجماعة لما نقول ظريفة يبقى ظريفة معلش نستحملها شوية)

الريس:نظنظ ازيك؟

نظيف:الحمد لله ياريس كله من خير معاليك

الريس:هو فى ازمة عيش بصحيح؟؟

نظيف:بيقولوا كده مش متاكد

الريس: طب عايزك تعمل حركتين كده وتعمل كام تصريح ان كله تمام وان بتوع الافران الى حرامية

نظيف:تحت امر سيادتك يا باشا

الريس:واخبار طلبية الغاز الى راحة اسرائيل ايه؟؟

نظيف: تمام يا فندم عاملين تخفيض 98%

الريس: مش كفاية مش كفاااااااية اعملوا تخفيض ل 99.5% لازم نكون متعاونين مع الاخوة

نظيف:تحت امر معاليك يا باشا

الريس:يلا سلاااام

نظيف:فى حفظ الله يافندم سلام سلام سلام

المشهد التالت
الزمان : اليوم الى بعد كده
المكان:استاد القاهرة الدولى تحديدا فى مدرجات الحاج جيمى

جيمى جالسا بجوار حرمه خديجة هانم المهم ميلت عليه كده وسالته:الا هو مصر لابسة ايه؟؟

جيمى فى عقل باله:بابا قال ايه بابا قال ايه؟؟ثم رد قائلا:مصر الاحمر يلا اجهزى عشان تعملى كام حركة

خديجة:يوووووه نسيت اجيب علم معايا يلا مش مهم

*****اكيد مش هنكمل الحوار لان شفنا صور خدوجة فى الجرايد*******


المشهد الرابع
الزمان: الله اعلم
المكان: مكتب عز الدخيلة

يجلس عز على كرسى اسود متحرك وخلفه صورة الريس ويشاهد اعلانات عز الدخيييييييييلة والفشر الى بنسمعه فى الاعلانات ده

zoro_119
فجأة رن جرس الهاتف رفع السماعه قائلا:بوكلتوف (زى صباح الخير كده بس بالاسرائيلى)

جيمى:بوكلتووووووووووف عزوزى حبيبى ازيك؟

عز:الحمد لله يا جيمى ايه اخبارك يا واد؟واخبار الحاج الوالد؟

جيمى:تماااااام تمام والحاج الوالد عايزك اهو

الريس ياخد سماعه الهاتف بعنف من جيمى فا رد عليه جيمى:اوعى كده ملخت الكوووووووم(معلش بيتفرج على راجل وست ستات)

الريس:ازيك ياد يا عز؟

عز:اهلا وسهلا يا ريس ازيك يا معالى الباشا؟

الريس:احسن منك المهم قولى طبعا انت عارف انك ماسك انتخابات المحليات

عز:ده شرف ليا يا ريس

zoro_119
الريس:مش عايز ولا واحد اخوان فى الحوار ده عايزهم ياخدوا بال....بالشوز(راجل ستايل طبعا)

عز:ولايكون عندك فكرة يا فندم ولا واحد فيهم داخل المحليات دى

الريس:واخبار اسعار الحديد ايه؟

عز:فى النار ياباشا ناااااااااااار

الريس:تماااااام تمااااااام يلا شالووووم

عز:شالووووووم

المشهد الخامس

المكان:بيتنا
الزمان:بعد نزول الموضوع ب ثانية

كان يجلس فارس(ده الى هو انا)مستمتع بموضوعه الجديد وفجاة سمع الباب(بيخبط جامد ورزع وهبد وبتاع)

اتجهت للباب قائلا:ميييييييييييييييين؟

رد عليا صوت:المعلم فالنتينو هنا؟ اييييييييه قصدى قائلا:افتح الباب المكان كله محاصر

وخير اللهم اجعله خير لقيت نفسى مرمى فى السجن المهم قلت:ياحكووووومة يا بوليييييييس معملتش حاجة

رد عليا صوت قائلا:بتشتم فى الريس ياد وطاخ قام ضربنى على قفايا

zoro_119
رديت:وربنا ماعملت حاجة ياباشا ده كلام فاضى عامل نفسى ناصح انا بموت فى الريس والحكومة وبنتخب جمال

رد الشخص:امممممممم ليلتك سودة يا معلم وسابنى ومشى

قلت:طب ياباشا ممكن لاب توب وخط نت بس؟؟

وفجأة انقطعت الانوار ونبقى نكمل بعدين بقى فى يوم تانى من الايام المطاطية

دمتم بود